Enska 203 - ENS 203 Lestur, hlustun, orðaforði
Undanfari: ENS 103
Áfangalýsing
Gerðar eru meiri kröfur til sjálfstæðra vinnubragða en í ENS 103. Lestur almennra og sérhæfðra texta sem ekki eru einfaldaðir. Unnið með orðabók þar sem það á við. Aukin áhersla á að nemendur tjái sig frjálst og óbundið. Markvissar hlustunaræfingar. Áhersla lögð á að byggja upp og auka við hagnýtan orðaforða með margvíslegum æfingum á öllum færnisviðum. Enskt talmál æft, m.a. í tengslum við les- og hlustunarefni. Í skriflega þættinum er gerð krafa um flóknari setningaskipan, nákvæmari orðaforða og skipulegri framsetningu en í fyrri áfanga.
Áfangamarkmið
Nemandi
Lestur
geti lesið þyngri texta en í ENS 103, t.d. fræðitexta, bókmenntatexta með tiltölulega flóknum söguþræði, texta í dagblöðum og tímaritum eða alls kyns upplýsinga- og heimildaritum og á Netinu
geti beitt mismunandi lestraraðferðum, þ.e. nákvæmnislestri, yfirlitslestri, hraðlestri og leitarlestri og viti hvenær hvað er viðeigandi
sé fær um að notfæra sér mismunandi hjálpargögn við lestur eftir því hver tilgangurinn er með lestrinum
Hlustun
- geti skilið einfalt, ótextað sjónvarpsefni/myndefni/ margmiðlunarefni/úrvarpsefni (t.d. fréttir) þar sem talað er með mismunandi hreim og tónlistartexta, t.d. dægurlagatexta
- geti fylgst með og skilið megininntak orðræðu þegar fjallað er um nokkuð sérhæft efni sem hann þekkir og tengist þeim efnisflokkum sem fjallað er um
Tal
- geti sagt það sem hann þarf að segja við algengustu aðstæður í daglegu lífi, t.d. á ferðalögum erlendis, í síma, í samskiptum við útlendinga heima fyrir, innan skólastof¬unnar, í óformlegum samræðum
- geti talað með eðlilegum hraða
- geti gefið til kynna virka hlustun með viðeigandi smáorðum eða upphrópunum og geti notað hikorð
- geti notað nýjan orðaforða sem unnið hefur verið með í efnisflokkum áfangans í nýju samhengi til að tjá eigin hugsun, skoðanir o.s.frv.
Ritun
- geti tjáð sig skriflega á skipulegan hátt og í nokkuð löngu máli (40-60 línur eða lengra)
- hafi náð tökum á grundvallaratriðum í ritgerðasmíð (upphafi, miðju, endi, röksemdafærslu, skiptingu í efnisgreinar)
- sýni skapandi notkun þess orðaforða sem unnið hefur verið með og á viðeigandi hátt eftir aðstæðum
- geri sér grein fyrir mikilvægi hjálpargagna við ritun, svo sem orðabóka
Málfræði
Dæmi um grundvallaratriði enskrar málfræði til upprifjunar og áherslu í ENS 203
þolmynd og germynd
notkun sagnarnafnorða og/eða nafnháttar með ákveðnum sögnum
flóknari tíðir sagna
sambandssagnir
forsetningar
orðflokkar og myndun orða
röð lýsingarorða
endaspurningar (question tags)
bein og óbein ræða
háttarmyndandi sagnir (modal verbs)
tilvísunarsetningar og skilyrðissetningar (framhald)
Námsmat
Við námsmat skal ávallt taka mið af þeirri vinnu sem nemendum er ætlað að inna af hendi samkvæmt námsáætlun og skulu kröfur gerðar í samræmi við það. Meta skal alla færniþætti í réttu hlutfalli við vægi þeirra í áfanganum. Nemendum sé alltaf gert ljóst hvað verið er að meta, hvernig, hvenær og hvers vegna. Námsmat getur verið í formi símats eða lokamats.
Dæmi um mat á færniþáttum
Lestur
Formleg prófun eða könnun á lesskilningi, svo sem krossapróf, eyðufyllingar, spurningar út texta. Óformleg könnun á lesskilningi, svo sem þegar nemendur gera útdrátt úr texta, semja spurningar, búa til orðagátur eða annars konar verkefni.
Hlustun
Hlusta í ákveðnum tilgangi og eftir tilteknum efnisatriðum. Svara skilningsspurningum, fylla í eyður (orð eða orðasambönd). Gera grein fyrir því sem hlustað hefur verið á í stuttu máli (t.d. endursögn, útdráttur - munnlegt eða skriflegt).
Tal
Samtal tveggja (ef til vill upptaka) um tiltekið efni við vissar aðstæður (8-10 mínútur) sem undirbúnar hafa verið í kennslunni. Þá er metið m.a. lengd samtals, innihald, flæði, orðaforði, framburður, upphaf og endir.
Ritun
Meta innihald og form ritgerða, orðanotkun og setningaskipan, stafsetningu og málfræði. Meta skap-andi notkun málsins, viðeigandi málnotkun eftir innihaldi og aðstæðum (register). Gefa ábendingar um villur og gefa nemendum tækifæri á að leiðrétta eftir leiðréttingarlykli.
